ТҮРКІСТАН ОБЛЫСЫНДА 13 ЖАЙЛЫ МЕКТЕП ПАЙДАЛАНУҒА БЕРІЛДІ
Білім беру жүйесінің сапасын арттыру – еліміздің дамуының басты басымдықтарының бірі. Осы орайда Мемлекет басшысы Қасым-Жомарт Тоқаевтың тапсырмасымен елімізде жүзеге асып жатқан «Жайлы мектеп» ұлттық жобасы аясында Түркістан облысында ауқымды жұмыстар жүргізілуде. Аталған бастама – жаңа форматтағы, заманауи және толыққанды инфрақұрылыммен жабдықталған білім ұяларын салу арқылы балалардың сапалы білім алуына қолайлы орта қалыптастыруды көздейді.
2024 жылдың қорытындысы бойынша Түркістан облысында «Жайлы мектеп» жобасы аясында салынуы жоспарланған 29 мектептің 13-і толық салынып, пайдалануға берілді. Қалған 16 мектептің құрылысы бүгінде қызу жүргізіліп жатыр. Осы және өзге де мәселелер Түркістан облысының әкімі Нұралхан Көшеровтің төрағалығымен өткен апталық аппарат мәжілісінде кеңінен талқыланды.
Өз сөзінде облыс әкімі бұл бастаманың стратегиялық маңызына тоқталып, білім саласындағы жүйелі өзгерістердің өңірдің болашағына тікелей әсер ететінін баса айтты.
«Мемлекет басшысының бастамасымен өңірімізде «Жайлы мектеп» жобасы бойынша 29 мектеп бой көтеріп жатыр. Бірқатары тапсырылды. Ал қазір құрылысы жалғасып жатқан қалған мектептер уақтылы және сапалы аяқталуы тиіс. Жұмыс сапасын қатаң бақылауда ұстаңыздар. Сонымен қатар мектептердің директоры, педагогикалық құрамын іріктеу, ұйымдастыру жұмыстары қатар жүруі керек. Бұл – білім сапасын көтеру бағытында жасалып жатқан маңызды жоба», – деді Нұралхан Көшеров.
Айта кетейік, «Жайлы мектеп» жобасының ерекшелігі – бұл тек жаңа ғимарат салу емес, кешенді әрі бірегей үлгіде жоспарланған білім беру кеңістігін құру. Жоба аясында әр мектепте пәндік кабинеттер, кең спорт залдар, асхана, шеберханалар, кітапханалар, ерекше қажеттілігі бар балаларға арналған бейімделген сыныптар және заманауи ІТ-инфрақұрылым қарастырылған.
Облыстық құрылыс басқармасының басшысы Сұлтанғали Жалқұлдың мәліметінше, 2025 жылы пайдалануға берілетін 16 мектептің 12-сінде шатыр жабылып, ішкі әрлеу, инженерлік инфрақұрылым тарту және сыртқы қасбетті әрлеу жұмыстары басталған. Қазіргі таңда бұл нысандардағы құрылыс жұмыстарының жалпы орындалуы 60 пайыздан асты. Ал қалған 4 мектептің негізгі қаңқасы көтеріліп, шатыр жабу, сыртқы және ішкі сылақ жұмыстары қарқынды жүргізілуде.
Бұл мектептер Түркістан облысының бірнеше ауданын қамтиды. Олардың ішінде оқушы орны тапшы, апатты мектептері бар және үш ауысымды оқу жүйесінде отырған елді мекендерге басымдық берілген. Әсіресе Түркістан, Кентау, Жетісай, Сарыағаш, Қазығұрт, Ордабасы, Шардара сияқты халқы тығыз орналасқан аудандарда «Жайлы мектептердің» ашылуы білім саласындағы өзекті проблемаларды шешуге мүмкіндік береді.
Жоба аясында салынатын мектептердің бірегейлігі олардың барлық инженерлік инфрақұрылым жүйелерінің 100 пайыз тартылғанында. Бұл дегеніміз – сапалы жылу, ауызсу, электр қуаты, интернет желісі және кәріз жүйесімен қамтамасыз етілген жаңа мектептер толыққанды заманауи талаптарға сай жұмыс істейтін болады.
Мұғалімдер қауымы мен ата-аналар бұл бастаманың маңыздылығын ерекше атап өтуде. Жаңа мектептердегі қолайлы жағдайлар, заманауи құрал-жабдықтар мен кең, жарық сыныптар балалардың білімге құштарлығын арттырып, педагогтердің де жұмысын жеңілдетпек.
Сондай-ақ, облыс басшысы әрбір жаңа мектепке білікті кадрларды тарту мәселесін де ерекше бақылауда ұстауды тапсырды. Бұл ретте Білім басқармасына педагог кадрлардың тапшылығы байқалатын аймақтарға арнаулы бағдарлама дайындап, оларды ынталандыру тетіктерін қарастыру жүктелді.
«Жайлы мектеп» ұлттық жобасының тағы бір артықшылығы – оның модульдік құрылыс жүйесінде жүзеге асырылуы. Бұл тәсіл құрылыс мерзімін қысқартып, сапаны сақтай отырып мектеп ғимараттарын тиімді салуға мүмкіндік береді. Сонымен қатар әр мектеп 500-ден 1200 оқушыға дейінгі сыйымдылықпен жоспарланып отыр.
Қорыта айтқанда, «Жайлы мектеп» ұлттық жобасы Түркістан облысында табысты жүзеге асып, өңірдегі білім беру инфрақұрылымының жаңаруына, оқушылар үшін қолайлы әрі қауіпсіз орта қалыптастыруға айтарлықтай үлес қосып отыр. Бұл бастама алдағы уақытта еліміздің өзге өңірлерінде де кеңінен жалғасын табатыны сөзсіз. Себебі сапалы білім – ел болашағының кепілі.
