ТҮРКІСТАНДА НАШАҚОРЛЫҚ ПЕН ЕСІРТКІ БИЗНЕСІНЕ ҚАРСЫ КҮРЕС БОЙЫНША АТҚАРЫЛҒАН ЖҰМЫСТАР САРАЛАНЫП, ЖОСПАРЛАР ТАЛҚЫЛАНДЫ
Түркістанда Нашақорлыққа және есірткі бизнесіне қарсы күресуге бағытталған қызметін үйлестіру жөніндегі өңірлік ведомствоаралық штабтың мәжілісі өтті. Жиында штаб төрағасы, облыс әкімінің орынбасары Бейсенбай Тәжібаев бұл мәселенің күрделі екеніне тоқталып, жауапты басқарма мен мекеме басшыларына жұмысты сапалы атқару керектігін айтты.
– Өздеріңіз білесіздер, Мемлекет басшысы психотропты заттардың айналымы, есірткі саудасына қатысты толықтырулар енгізілген заңға қол қойды. Талап күшейе түсті. Сондықтан жұмысты жандадыру керек. Штаб мәжілісінде өзекті мәселелерді жасырмай айтыңыздар. Әсіресе, аудан, қалалардағы әріптестер кездескен қиындықтар, жұмысты үйлестіру жөніндегі пікірлерін айтқаны жөн. Ол ұсыныстар хаттамаға енгізіліп, жұмыс жүйелене түседі. Құқық қорғау органдары тарапынан есірткі бизнесінің алдын алу және нашақорлыққа қарсы күрес жүргізілуде. Алайда бұл індетпен барлығымыз күресуіміз керек. Жастар мен жасөспірімдер арасында профилактикалық жұмыс күшейтілуі тиіс. Білім ұяларында, жастар шоғырланатын орындарда тиісті шараларды атқарыңыздар. Бұл жұмыстарға еріктілер мен үкіметтік емес ұйымдарды көптеп тартқан жөн, – деген Бейсенбай Тәжібаев аудан, қала әкімдері орынбасарлары мен жауапты мекеме басшыларының есептерін тыңдады.Мәжілісте Білім, Денсаулық сақтау, Қоғамдық даму басқармалары мен Полиция департаменті, Экономикалық тергеп-тексеру департаменті өкілдері баяндама жасап, атқарылған жұмыстарға тоқталды. Түркістан облысы Полиция департаменті бастығының орынбасары Құрманбек Сахов әкімдікпен бірлесе жұмысты жандандыруға дайын екенін жеткізді.Есірткі заттарын сату бойынша интернет желісі және көшелер мен үй қабырғаларындағы граффити жазбаларды жедел анықтап, құзырлы органдарға хабарлау, түнгі көңіл көтеретін мекемелердегі сусындарда есірткі құралдарының болмауын қатаң қадағалау, тұрғындар мен жастар арасында синтетикалық есірткілердің зияндығы және олардың заңсыз айналымы бойынша заң алдындағы жауапкершіліктері туралы түсіндіру-профилактикалық іс-шараларын күнделікті өткізу жөнінде және өзге ұсыныстар берілді.2024 жылдың басынан бері Түркістан облысында құқық қорғау органдарының ұйымдастыруымен жедел-іздестіру шаралары жүргізіліп, 16 заңсыз прекурсорлар айналымына қатысты құқық бұзушылық тіркелген. 5 заңсыз өндіріс орны анықталып, 1100 литр химиялық заттар тәркіленді. 3 ұйымдасқан қылмыстық топ әшкереленіп, олардан прекурсорларды заңсыз тасымалдау және өткізу бойынша айғақтар табылды. 8 жеке кәсіпкер лицензиясыз жұмыс істегені үшін әкімшілік жауапкершілікке тартылған.Облыста есірткінің заңсыз айналымына қатысты 114 дерек анықталды. Заңсыз айналымнан 69 келі есірткі заттары тәркіленіп, жойылған. Ал әлеуметтік желіде мониторинг жүргізу барысында «Киберқадағалау» ақпараттық жүйесіне енгізілген синтетикалық есірткіні жарнамалайтын 290 сайттың жұмысы тоқтатылған. Аймақта нашақорлық, темекі шегу және алкоголизм профилактикасы бойынша тиісті жұмыстар жалғасады.