ТҮРКІСТАН ОБЛЫСЫНДА ӨҢДЕУ ӨНЕРКӘСІБІНДЕ 13 ІРІ ЗАУЫТ ПЕН КӘСІПОРЫН АШЫЛДЫ

Түркістан облысында соңғы жылдары экономикалық даму жаңа серпін алып, өндіріс саласында тың серпілістер байқалуда. 2024 жылы облыстың жалпы өңірлік өнім көлемі алдын ала есептеулер бойынша 4 трлн теңгеден асып, өңірдің өндірістік әлеуетінің артуын айқын көрсетті. Бұл көрсеткіш – аймақтың экономикалық дамуына жасалған инвестициялардың, қолға алынған жобалардың және іске қосылған өндіріс орындарының нақты нәтижесі.

Қысқа мерзімді экономикалық индикатор бойынша 2024 жылғы қаңтар-желтоқсан айларындағы даму қарқыны 111%-ды құрады. Бұл облыстың экономикалық тұрақтылығы мен өсуіне деген сенімді арттыра түседі. Ал өнеркәсіп саласындағы өнім өндіру көлемі 1 214,0 млрд теңгеге жетіп, 2023 жылдың осы кезеңімен салыстырғанда нақты көлем индексі 110,1% құраған. Бұл – өңірдегі индустрияландыру бағыты бойынша жүргізіліп жатқан саясаттың дұрыс жолда екенін білдіреді.

Өңірдегі өндірілген өнеркәсіп өнімінің 44,4%-ын тау-кен өндіру саласы құрап отыр. Бұл салада өндірілген өнім көлемі 540 млрд теңгеге жетіп, жер қойнауын тиімді игерудің көрсеткіші ретінде айқындалып отыр. Дегенмен, өндірістік құрылымда басымдыққа ие сала – өңдеу өнеркәсібі. Өңдеу өнеркәсібі өнімінің көлемі 585,4 млрд теңгені құрап, бұл сала жалпы өнеркәсіп өнімінің 48,2%-ын қамтып отыр.

2023 жылы өңдеу өнеркәсібі саласында жалпы құны 24,957 млрд теңгені құрайтын 13 ірі инвестициялық жоба іске асырылып, 528 жаңа жұмыс орны ашылған. Бұл тек экономиканың дамуына ғана емес, өңір тұрғындарының жұмыспен қамтылуына да зор әсерін тигізуде. Аталған жобалар арқылы өңірдің өнеркәсіптік картасы кеңейіп, жаңа технологиялар енгізілуде.

Ашылған ірі кәсіпорындар мен зауыттар қатарында:

• «Ideal Turkistan» ЖШС – жиһаз фабрикасы (25 жұмыс орны). Түркістанда ішкі нарыққа бағытталған, сапалы жиһаз өнімдерін шығаратын бұл фабрика – отандық өндірістің дамуына үлес қосуда.

• «AsiaBrand» ЖК – жиһаз фабрикасы (25 жұмыс орны). Жергілікті шикізат пайдаланып, ұлттық стильде жасалған өнімдерімен ерекшеленеді.

• «Қарқын-2030» ЖШС – ет өнімдерін қайта өңдеу жобасы (30 жұмыс орны). Бұл жоба ауыл шаруашылығы саласына тікелей ықпал етіп, ет өңдеу процесінің заманауи жүйесін қалыптастырады.

• «СП ТУРАН-МЕБЕЛЬ» ЖШС – жиһаз фабрикасы (40 жұмыс орны). Жоғары сапалы жиһаз түрлерін өндірумен қатар, экспорттық бағытта жұмыс істеуді жоспарлап отыр.

• «Қазақстан Нұр 001» ЖШС – шұлық өндірісі (30 жұмыс орны). Жеңіл өнеркәсіп саласындағы бұл жобаның өнімі ішкі сұранысты қамтып, шетел нарығына да шығуға әлеуетті.

• «GRAND STROY KAZ» ЖШС – темірбетон бұйымдарын өндіру жобасы (30 жұмыс орны). Құрылыс индустриясын дамытудағы маңызды кәсіпорын.

• «Akniet Holding» – жиһаз фабрикасы (80 жұмыс орны). Аймақтағы ең ірі жиһаз өндіруші кәсіпорындардың бірі ретінде жұмыс істеуде.

• «BNK Group Ltd» ЖШС – жаңбырлатып суғару құрылғыларын өндіру жобасы (20 жұмыс орны). Агроөнеркәсіптік кешен үшін аса қажет техникамен қамтуда.

• «Бөрте Милка» – сүт өңдеу зауытын кеңейту жобасы (18 жұмыс орны). Жоғары сапалы сүт өнімдерін ұсыну арқылы өңірдің азық-түлік қауіпсіздігін нығайтуда.

• «JNRAY Group» ЖШС – тігін фабрикасы (50 жұмыс орны). Әйелдердің жұмыспен қамтылуына оң әсер етіп отырған бұл жоба әлеуметтік маңызға ие.

• «KazPlast» ЖШС – тігін фабрикасы (150 жұмыс орны). Жеңіл өнеркәсіп саласындағы көшбасшылардың бірі болуға ұмтылып отыр.

• «BASPOLYMER» ЖШС – полимерлі құбырлар, пластмассадан бұйымдар мен тамшы таспа өндіретін зауыт (15 жұмыс орны). Сумен жабдықтау және ирригация саласында сұранысқа ие өнім шығарады.

• «CaPable Group» МҚБ – итальяндық технология негізінде жөргектердің жаңа түрін өндіру жобасы. Бұл жоба импортқа тәуелділікті азайтып, отандық өнімнің сапасын арттыруға бағытталған.

Облыс әкімі Нұралхан Көшеровтің тікелей тапсырмасымен инвестиция тарту, жаңа өндіріс орындарын ашу, кәсіпкерлікті қолдау бағытындағы жұмыстар жүйелі түрде жалғасып келеді. Инвесторлармен кездесулер, арнайы индустриалды аймақтар құру, инфрақұрылыммен қамту – осының барлығы өңірдің инвестициялық тартымдылығын арттыра түсуде.

Индустрияландырудың келесі кезеңінде жоғары технологиялы өндірістерді дамыту, жасыл экономика қағидаттарын енгізу, экспортқа бағытталған кәсіпорындар ашу жоспарланып отыр. Түркістан облысы тек аграрлы өңір ғана емес, индустриалды-инновациялық дамуға бағыт алған жаңа форматтағы өндірістік аймақ ретінде қалыптасып келеді.