ТҮРКІСТАН ОБЛЫСЫНДА ӘЙЕЛДЕР КӘСІПКЕРЛІГІН ДАМЫТУ БОЙЫНША КЕЛІССӨЗ ЖҮРГІЗІЛДІ

Түркістан өңірінде кәсіпкерлік саласында тағы бір маңызды кездесу өтті. Түркістан облысы әкімінің орынбасары Нұрбол Тұрашбеков пен Түркияның кәсіпкер әйелдер саласындағы жетекші ұйымдары – Ыстамбұл Сауда палатасы мен Кәсіпкер әйелдер қауымдастығының делегациясы кездесу өткізіп, екі ел арасындағы экономикалық серіктестік пен әйелдер кәсіпкерлігін дамыту жайын талқылады. Бұл кездесу Қазақстан мен Түркия арасындағы іскерлік қарым-қатынастарды нығайту бағытында жасалған тағы бір нақты қадам ретінде бағалануда.

Кездесу барысында түркиялық делегация құрамындағы белгілі кәсіпкер әйелдер – Сабрие Коджабалкан, Мехлика Гидер және Капуджу Аху өздерінің тәжірибелерімен бөлісіп, KAISDER қауымдастығы аясында іске асып жатқан жобалар жөнінде жан-жақты мағлұмат берді. Олар Қазақстандағы кәсіпкер әйелдермен іскерлік байланысты тереңдетіп, бірлескен жобалар арқылы әйелдердің экономикалық белсенділігін арттыруға ықпал етуді мақсат ететінін жеткізді.

Нұрбол Тұрашбеков өз сөзінде Түркістан өңірінің экономикалық әлеуетіне тоқталып, ауыл шаруашылығы, туризм, қолөнер, жеңіл өнеркәсіп және өзге де бағыттарда әйелдер кәсіпкерлігін дамытуға толық мүмкіндік бар екенін айтты. Сондай-ақ, ол өңірдегі әйелдердің бизнестегі үлесін арттыру үшін халықаралық серіктестік пен инвестициялық жобалардың маңыздылығын ерекше атап өтті.

Тараптар келіссөз барысында Қазақстанда әйелдер кәсіпкерлігін қолдауға бағытталған нақты жобаларды қарастырды. Соның ішінде әйелдерге арналған арнайы кооперативтер құру, брендинг және өнімдерді коммерцияландыру бойынша кеңес беру орталығын ашу, сондай-ақ тәжірибе алмасу мақсатында екі ел арасында тұрақты байланыс орнату сынды бастамалар көтерілді. Бұл жобалар Түркияда бұрыннан сәтті жүзеге асып келе жатқан әйелдер кооперативтерінің үлгісі негізінде қолға алынбақ.

Атап айтқанда, ауыл шаруашылығы, азық-түлік өндірісі, тоқыма және тігін салалары сынды дәстүрлі әрі әлеуеті жоғары бағыттарда әйелдердің бастамаларын қолдау басты назарда болмақ. Түрік тарапы ұсынған Bikoop әйелдер кооперативі мен KAISDER қауымдастығының тәжірибесі Қазақстанда да ұқсас құрылымдар құруға жол ашады. Бұл өз кезегінде ауыл-аймақтардағы жұмыссыз әйелдерге жаңа мүмкіндік сыйлап, олардың экономикалық тұрғыдан өз-өзін қамтуына жол ашады.

Жоба аясында ұйымдастырылатын оқыту курстары, кәсіпкерлік негіздеріне баулу, маркетинг, бренд қалыптастыру, заманауи сауда тетіктерін меңгерту – барлығы да әйелдердің бизнеске деген сенімін нығайтып, табыс табуына мүмкіндік бермек. Сонымен қатар, ауылдық жерлерде шағын өндіріс ошақтарын ашып, өнімді ішкі және сыртқы нарықтарға шығару көзделіп отыр.

Бұл бастама – Қазақстандағы гендерлік теңдік мәселесін ілгерілетуге де өзіндік үлес қосады. Әйелдердің қоғамдағы рөлін күшейту, экономикалық тәуелсіздігін қамтамасыз ету – тұрақты даму мақсатына қол жеткізудің бірден-бір жолы. Түркиялық серіктестермен жасалған келісімдер – бұл бағыттағы нақты тетіктердің бірі болмақ.

Кездесуде сондай-ақ екіжақты ынтымақтастық аясында өзара тауар айналымын арттыру, бірлескен көрмелер мен жәрмеңкелер өткізу, әйел кәсіпкерлердің халықаралық бизнес-форумдарға қатысуына қолдау көрсету мәселелері де қозғалды. Болашақта екі елдің кәсіпкер әйелдері бір-бірінің тәжірибесінен үйреніп, ортақ жобалар жасау арқылы тек экономикалық емес, мәдени және әлеуметтік байланыстарды да дамытпақ.

Түркістан облысының әкімдігі бұл бастамаларды қолдай отырып, әйелдер кәсіпкерлігіне бағытталған бағдарламаларды жетілдіру, қаржыландыру көздерін тарту және инфрақұрылымдық қолдау көрсету бағытында жұмыс жүргізетінін мәлімдеді.

Осылайша, Түркістанда өткен бұл маңызды кездесу – әйелдердің экономикалық белсенділігін арттыруға, халықаралық деңгейдегі серіктестікті нығайтуға және жаңа мүмкіндіктерге жол ашатын тарихи әрі стратегиялық маңызы бар қадам болып саналады.