ҚАЛАНЫҢ ИНФРАҚҰРЫЛЫМЫН ЖАҚСАРТУ БАҒЫТЫНДАҒЫ ЖҰМЫСТАР ЖАЛҒАСА БЕРЕДІ
Арыс қаласы соңғы жылдары әлеуметтік-экономикалық даму бағытында елеулі жетістіктерге қол жеткізді. Қала әкімдігі тарапынан тұрғындардың әл-ауқатын жақсарту, қолайлы өмір сүру ортасын қалыптастыру, инфрақұрылымды жаңарту бойынша жүйелі түрде ауқымды жұмыстар жүргізілуде. Бұл бағыттағы жұмыстар қала әкімі Қайсар Маңқараевтың басшылығымен жаңа серпін алып, нақты тапсырмалар мен кезең-кезеңімен жүзеге асырылып келеді.
Қазіргі уақытта Арыс қаласында жолдар мен жаяу жүргіншілерге арналған өткелдер, тұрғын үй аулаларын абаттандыру, көше жарығын жаңарту, су және кәріз жүйелерін қалпына келтіру секілді бірқатар маңызды инфрақұрылымдық жобалар қолға алынған. Қала көшелерінің жай-күйін саралау мақсатында кешенді зерделеу жұмыстары жүргізілуде. Бұл жұмыстар бюджет мүмкіндігіне қарай кезең-кезеңімен жүзеге асырылып, нәтижесінде қала келбеті жаңара түспек.
Қала әкімінің тапсырмасына сәйкес, әкімнің орынбасары Алмаз Сұлтанов бастаған жұмыс тобы қаланың бірқатар аумақтарын аралап, нақты мәселелерге назар аударды. Атап айтқанда, И.Ақынбеков пен К.Отаров көшелерінің қиылысында орналасқан жаяу жүргіншілер өткелінің қазіргі жай-күйі тексерілді. Бұл аумақта тұрғындар тарапынан қауіпсіздікке байланысты бірнеше мәрте шағымдар түскен. Осыған байланысты, өткелді қауіпсіз және ыңғайлы ету бойынша нақты ұсыныстар әзірленуде. Болашақта бұл өткелге заманауи бағдаршамдар орнатылып, жол белгілері жаңартылып, жарықтандыру жүйесі ретке келтіріледі.
Бұдан бөлек, қала тұрғындарының өтініші негізінде «Почтовый» тұрғын ауданындағы көпқабатты үйлердің аулаларын абаттандыру мәселесі қаралды. Тұрғындар аулалардың жарықсыз, аяқ жолдардың тар және тозған күйде екенін айтып, әкімдікке өтініш білдірген болатын. Осыған орай, аулаларға асфальт төсеу, жарықтандыру жүйесін орнату, ойын алаңдарын салу, аяқ жолдар салу және қоқыс контейнерлерін жаңарту сынды жұмыстар жоспарға енгізілді.
Жергілікті халықтың ұсыныстары ескерусіз қалмайды. Әкімдік өкілдері тұрғындармен кездесулер өткізіп, нақты қажеттіліктерін анықтауға мүдделі. Мұндай ашық диалог форматы — халық пен билік арасындағы сенімді нығайтудың тиімді жолы. Әкімдік өкілдері абаттандыру жұмыстары барысында тұрғындардың пікірлерін негізге ала отырып, жобаларды тиімді жүзеге асыруды мақсат тұтып отыр.
Қала инфрақұрылымын жақсартуда ауыз су, кәріз жүйесі және электр энергиясымен қамту да басты назарда. Кейбір ескі көшелерде ауыз су құбырлары ескіріп, жиі апатты жағдайларға тап болуда. Осыған байланысты кезең-кезеңімен жаңарту жұмыстары басталып кетті. Әсіресе, қала шетінде орналасқан жаңа ықшам аудандарды инженерлік инфрақұрылыммен қамту – күн тәртібіндегі маңызды мәселенің бірі.
Сонымен қатар, Арыстағы жолдарды жөндеу жұмыстары да қарқын алуда. Қазіргі таңда бірнеше көшеде орташа жөндеу жұмыстары жүргізіліп жатыр. Жол белгілері жаңартылып, бордюрлер мен жаяу жүргіншілер жолдары салынып жатыр. Бұл — жол-көлік оқиғаларының алдын алып, тұрғындар үшін қауіпсіз ортаны қалыптастыруда маңызды қадам.
Қала әкімдігі 2024–2025 жылдарға арналған инфрақұрылымдық даму жоспарын бекіткен. Бұл жоспар аясында қала аумағында 50-ге жуық көше жөнделеді, 15 жаңа балалар ойын алаңы салынады және бірнеше спорттық нысан іске қосылады. Сонымен бірге, тұрғын үйлердің аулаларын көгалдандыру мен суару жүйесін орнату, қоғамдық орындарға бейнебақылау камераларын орнату мәселелері де жоспарға енгізілген.
Қала әкімі Қайсар Маңқараевтың айтуынша:
«Қаланың дамуы — тұрғындардың әл-ауқаты мен тұрмыс сапасына тікелей әсер етеді. Сондықтан біз инфрақұрылымды жақсарту арқылы өмір сүруге жайлы орта қалыптастыруға бар күшімізді саламыз. Барлық жұмыстар халықпен бірлесіп, ашық әрі есеп беруге негізделген форматта жүргізіледі», — деді әкім.
Қорыта айтқанда, Арыс қаласында инфрақұрылымды жақсарту жұмыстары жүйелі түрде жалғасуда. Қала әкімдігі әрбір тұрғынның өтінішіне құлақ асып, нақты әрекет ету арқылы халықтың тұрмыстық сапасын арттыруға ниетті. Болашақта Арыс қаласының келбеті жаңарып, тұрғындар үшін ыңғайлы әрі қауіпсіз орта қалыптасатынына сенім мол.
