АРЫСТЫҚТАР ЖАҢА ЖЫЛДЫ САЛТАНАТПЕН ҚАРСЫ АЛДЫ
Арыс қаласы жаңа 2025 жылды ерекше салтанатпен, үлкен қуанышпен қарсы алды. Қаланың жүрегі саналатын әл-Фараби алаңында өткен дәстүрлі жаңа жылдық мереке қала тұрғындары мен қонақтарының басын біріктіріп, көңілдеріне шаттық ұялатты. Мерекелік шараға жүздеген адам жиналып, жаңа жылдың алғашқы сәттерін бірге қарсы алуға асықты.
Алаң мерекеге сай безендіріліп, түрлі түсті шамдармен көмкерілген жасыл шырша биіктен көз тартып тұрды. Кешкілік уақыттағы жарқыраған жарықтар, көз сүйсіндірер шамдар мен әсем музыкалар қаланың мерекелік ажарын айшықтай түсті. Шыршаның жанында балалар мен ата-аналар суретке түсіп, тәтті көңіл күйде уақыт өткізді.
Салтанатты кештің шымылдығы құттықтау сөздермен ашылды. Арыс қаласының әкімі Қайсар Маңқараев пен қалалық Мәслихаттың төрағасы Қайрат Ахметов жиналған қауымды жаңа жыл мерекесімен құттықтап, әрбір отбасына мол бақыт, татулық пен береке тіледі. Олар өткен 2024 жылдың басты жетістіктеріне шолу жасап, алдағы жылы да ілгерілеу мен өркендеу болатынына сенім білдірді. Әкім өз сөзінде халықтың ынтымағы мен еңбегінің арқасында Арыс қаласының көркейіп келе жатқанын ерекше атап өтті.
Шара мерекелік концертпен жалғасты. Қала өнерпаздары арнайы дайындалған жаңа жылдық бағдарламасын тарту етіп, ән мен биден шашу шашты. Сахна төрінде балабақша тәрбиеленушілерінен бастап, кәсіби әншілер мен би топтарына дейін өнер көрсетіп, көрермендерге мерекелік көңіл күй сыйлады. Балалар үшін арнайы ойын аттракциондары ұйымдастырылып, ертегі кейіпкерлері шырша жанында балалармен бірге ойындар ойнап, ән айтып, биледі.
Кеш соңында мерекелік отшашу тұрғындарға ерекше әсер қалдырды. Көк жүзін жарып шыққан түрлі түсті фейерверктер жаңа жыл түнін ертегіге айналдырғандай болды. Алаңға жиналған халық бұл сәттерді ұялы телефондарына түсіріп, есте қаларлық естелікке айналдырды.
Жалпы, Арыс қаласының жаңа жылды қарсы алу салтанаты бірлік пен ынтымақтың көрінісі болды. Қала тұрғындары жаңа жылды шаттыққа, үміт пен сенімге толы көңілмен қарсы алып, 2025 жыл жақсылық пен табыстар жылы болсын деген тілекпен тарқасты.
Жаңа жыл әрбір шаңыраққа құт-береке, ырыс-дәулет әкелсін! Берекелі Арыс қаласы жаңа жылда да жаңа табыстар мен жетістіктерге жете бергей!
