АРЫС ҚАЛАСЫ ӘКІМІ «ОРТАЛЫҚ БАЗАРДЫҢ» ЖАҒДАЙЫН БАҒАЛАДЫ
Бүгін Арыс қаласының әкімі Қайсар Маңқараев қаладағы сауда-саттықтың негізгі орталықтарының бірі саналатын «Орталық базарға» арнайы барып, ондағы қазіргі жағдайды өз көзімен көріп, зерделеді. Сапар барысында әкім базар аумағымен толық танысып, сатушылармен және базар әкімшілігімен пікір алмасты. Кездесуде сауда алаңын заман талабына сай ету, тұрғындар мен кәсіпкерлер үшін қолайлы жағдай жасау мәселелері кеңінен талқыланды.
Әкім базар инфрақұрылымының қазіргі жағдайына ерекше тоқталып, бірқатар нақты тапсырмалар берді. Әсіресе, суағар жүйесінің дұрыс жұмыс істемеуі, жауын-шашын кезінде судың жиналуы – маңызды мәселелердің бірі ретінде көтерілді. Сонымен қатар, автотұрақтардың жетіспеушілігі, бей-берекет тұрақтар мен көлік қозғалысын реттеу де күн тәртібіне шығарылды. Өрт қауіпсіздігі талаптарының сақталуы, өрт сөндіру құралдарының жеткіліктілігі және олардың техникалық жағдайы да тексерілді. Қала басшысы бұл мәселелердің барлығы тұрғындардың қауіпсіздігімен тікелей байланысты екенін айтып, олардың жедел түрде шешілуі керектігін жеткізді.
Бұдан бөлек, жабайы және жайма сауданың ретсіз орналасуы, жаяу жүргіншілерге кедергі келтіруі, жол қозғалысына қауіп төндіруі сияқты жағдайлар да сынға алынды. Қайсар Маңқараев мұндай бейберекет сауданың алдын алып, тәртіп орнатудың маңыздылығын атап өтті. Сауда нүктелерін тиісті орындарға көшіру арқылы базар аумағында тазалық пен тәртіпті сақтау қажеттігін қадап айтты.
Әкім әсіресе азық-түлік, көкөніс-жеміс және құрылыс материалдары сатылатын секторларды нақты аймақтарға бөлу қажеттігіне тоқталды. Бұл базардың құрылымын жүйелеп, сатып алушылар мен сатушылардың қозғалысын реттеуге мүмкіндік береді. Мұндай әдіс сауда процесін жеңілдетіп қана қоймай, қауіпсіздікті де арттырады.
Қала әкімінің бастамасымен базар инфрақұрылымын кешенді жаңғырту бойынша арнайы жұмыс тобы құрылатын болды. Бұл топтың құрамына базар басшылығы, кәсіпкерлер, қалалық сәулет, құрылыс және тұрғын үй-коммуналдық шаруашылық бөлімдерінің өкілдері енетін болады. Жұмыс тобы алдағы уақытта базарды жаңғырту бойынша нақты іс-шаралар жоспарын жасақтап, жүзеге асырады.
Сондай-ақ, қала әкімдігі тарапынан «Орталық базардың» айналасында орналасқан әлеуметтік нысандармен үйлесімді жұмыс істеу, көлік қозғалысын оңтайландыру және көше бойындағы сауда нүктелерінің қызметін заңдастыру бағытында да нақты жұмыстар жүргізілмек. Бұл – тек базар аумағын емес, бүкіл қаланың келбетін жақсартуға ықпал ететін маңызды қадамдардың бірі.
Қайсар Маңқараев қала тұрғындарының жайлы әрі қауіпсіз ортада сауда жасауға, демалуға, қызмет алуға құқылы екенін атап өтті. Сондықтан жергілікті билік алдағы уақытта да базарлардың жағдайын жақсартуға, халықпен кері байланыс орнатуға, кәсіпкерлердің пікірлерін ескеруге баса мән беретін болады.
Арыс қаласы әкімінің баспасөз қызметі атап өткендей, мұндай кездесулер мен тексерулер алдағы уақытта тұрақты түрде жүргізіліп отырады. Бұл халық пен билік арасындағы ашық әрі тиімді байланысты нығайтуға бағытталған жүйелі жұмыс.
